Samarqand shahridagi yo‘lovchi tashish transportlari haydovchilaridan 200 nafari “Yangi yil bayrami qahramonlari” qiyofasida kiyintiriladi, transport vositalari esa bayram ruhiga mos suratlar bilan bezatiladi. Bu haqda “Zarafshon” gazetasining Feysbukdagi sahifasida xabar berildi, deb yozadi UZ24.
Xabarga ko‘ra, Samarqandda viloyat hokimligi ishlab chiqqan chora-tadbirlar rejasi asosida Yangi yil bayramini o‘tkazishga tayyorgarlik boshlandi. Shahar ko‘chalari bayramga mos ravishda bezatilmoqda, ko‘chalar obodonlashtirilmoqda.
Shuningdek, bayram arafasida keng jamoatchilikni jalb qilgan holda “Eng chiroyli bezatilgan archa”, “Eng chiroyli bino” va “Eng namunali ko‘cha” nominatsiyalari bo‘yicha tanlov e’lon qilinadi, g‘oliblar esdalik sovg‘alari bilan taqdirlanadi.
Bu yil bayram tadbirlari Samarqand shahrining 6 ta joyida tashkil qilinadi:
- Viloyat musiqali drama teatri yonidagi maydon;
- Temiryo‘l vokzali oldidagi maydon;
- Sartepo maskani (Samarqand iqtisodiyot va servis instituti qoshidagi 2-son akademik litsey oldidagi maydon);
- Kimyogarlar shaharchasi (“Dilshod” restorani oldidagi maydon);
- So‘lim shaharchasi (2-son zamonaviy madaniyat va dam olish markazi binosi oldidagi maydon);
- Farhod shaharchasi (“Zarafshon” istirohat bog‘i).
Izoh (0)