AQShning O‘zbekistondagi elchixonasi Facebook’dagi sahifasi orqali viza berish xizmati uchun to‘lovlar haqida ma’lumot berdi.
“Barcha murojaat etuvchilar, shu jumladan bolalar ham, o‘zlari murojaat etayotgan viza toifasiga muvofiq ma’muriy to‘lovni to‘lashi shart. Bu to‘lov AQSh elchixonasi hududida, konsullik bo‘limi g‘aznachisiga to‘lanadi. To‘lovni faqat naqd AQSh dollarida to‘lash mumkin”, — deyiladi xabarda.
AQSh elchixonasida to‘lovga qabul qilinadigan kupyuralarga muayyan, qat’iy talablar o‘rnatilgan bo‘lib, bu talablar O‘zbekiston Milliy banki talablariga asoslangan. AQSh elchixonasi kir, zarar yetkazilgan, yirtilgan, ustiga chizilgan, muhrlangan va 1997-yildan avval muomalaga chiqarilgan kupyuralarni qabul qilmaydi. Elchixona talablariga javob bermaydigan kupyuralar olib kelgan murojaat etuvchilar qaytariladi va internet orqali boshqa kunga qabulga yozilib kirishi so‘raladi.
Konsullik bo‘limi to‘lovlar uchun o‘zbek so‘mini qabul qilmaydi. Murojaat etuvchilar viza murojaati bo‘yicha rad javobi berilganda murojaatni ko‘rib chiqish uchun to‘langan to‘lov miqdori qaytarib berilmasligini yodda tutishi lozim.
Izoh (0)