Meksikalik fotomuxbir Edgar Daniel Kastro 6-oktabr, juma kuni Meksikaning markaziy qismida joylashgan San-Luis-Potosi shahri aeroporti hududidan o‘lik holda topildi. Bu haqda El Universal nashriga tayanib, “TASS” xabar berdi. Qiynoqqa solinganlik alomatlari mavjud jasad temir yo‘l ko‘tarmasidan topilgan.
4-oktabr, chorshanba kuni o‘zlarini politsiya xodimi deb tanishtirgan uch nafar erkak Kastroni noma’lum yo‘nalish bo‘yicha olib ketgan. Keyinroq huquq-tartibot idoralarining o‘g‘irlab ketilishga aloqadorligi haqidagi iddaolar rasman rad etilgan.
Lo Jornada gazetasining yozishicha, Kastro joriy yilda Meksikada qasddan o‘ldirilgan 10-jurnalist. So‘z erkinligiga qarshi jinoyatlarni tekshirish bilan shug‘ullanuvchi maxsus prokuraturaning ma’lumotlariga ko‘ra, jurnalistlarga qarshi jinoyatlarning 99,85 foizi jazosiz qolmoqda. 2000-yildan buyon Lotin Amerikasi mamlakatida 104 nafar OAV xodimi jinoyatchilar qurboniga aylangan.
Izoh (0)