Fotogalereya: “Taxtlar o‘yini”ni yanada sevimliroq serialga aylantiruvchi faktlar

AdMe “Taxtlar o‘yini” seriali borasida siz bilmagan qiziqarli ma’lumotlarni to‘plab taqdim etdi.

Jorj Martin yoshligida Jon Snouga o‘xshash bo‘lgan

Jon Snou rolini o‘ynagan Kit Xaringtonning ko‘rinishi muallif Jorj Martinning yoshligiga juda o‘xshab ketadi.

Teon — Lili Allenning ukasi

Teon roli ijrochisi Alfi Allen mashhur qo‘shiqchi Lili Allenning tug‘ishgan ukasi. Liliga hatto serialda suratga tushish taklifini bildirishgan, biroq u ssenariyni o‘qib ko‘rgach, rad javobini bergan.

Keytelin Stark — Germionaning onasi

Keytelin Stark roli bilan barchaga birdek manzur bo‘lgan aktrisa Mishel Feyri Garri Potter haqidagi filmlarda Germionaning onasi rolini ijro etgan.

Mirsella va Tommen real hayotda uchrashib turishadi

Serseyaning farzandlari rolini ijro etgan Eymi Richardson hamda Din-Charlz Chepmen real hayotda uchrashib turishadi.

Eymon rolini ijro etgan aktyor rostdan ham ko‘r bo‘lgan

Eymon Targarien rolini ijro etgan marhum Piter Vonning ko‘rish qobiliyati yomon bo‘lgan va u deyarli hech nimani ko‘ra olmagan.

Madonna Deyenerisning ko‘ylagini ijaraga olgan

Madonna ham “Taxtlar o‘yini” serialini tomosha qiladi. Qo‘shiqchi hatto bir safar serial yaratuvchilaridan Deyeneris Targarien ko‘ylagini berib turishlarini iltimos qilgan.

Serial yaratuvchilari Temir taxtni sotib yuborgan

Avvallari serial yaratuvchilari Temir taxtning nusxasini 20 ming funtdan sotgan. Nusxaning balandligi 2 metr, og‘irligi esa 159 kilogramm bo‘lgan.

Tirion roliga kasting o‘tkazilmagan

Ssenariy mualliflari Tirion Lannister rolida Piter Dinkleyjdan boshqa aktyorni ko‘ra olishmagan. Dinkleyj esa o‘z navbatda serialga do‘sti, Serseya rolini ijro etgan Lina Xidini olib kelgan.

 Garvardda “Taxtlar o‘yini” o‘rganiladi

Garvardda “Haqiqiy ‘Taxtlar o‘yini’: zamonaviy afsonalardan o‘rta asr modellariga qadar” maxsus kursi o‘tiladi.