Burkina-Fasoda jihodchilar qahvaxonaga hujum qildi, 17 kishi halok bo‘ldi

Burkina-Fasodagi qahvaxonaga hujumda 17 kishi qurbon bo‘ldi, sakkiz kishi jarohatlandi, deb yozadi “RIA Novosti” aloqa vaziri Remi Danjinuga tayanib.

Halok bo‘lganlar va yaralanganlarning qaysi davlat fuqarolari ekanligi noma’lum. Danjinu jabrlanganlar “turli millatlar vakillari” ekanligini aytdi.

Bundan tashqari, aloqa vaziri ma’lum qilishicha, hukumat tekshiruv ishlarini boshlagan. Xavfsizlik kuchlari mamlakat aholisini osoyishtalikni saqlab, bu dahaga yaqinlashmaslikni so‘radi.

Uch erkak mahalliy vaqt bilan 21:30 (Toshkent vaqti bilan 02:30)da “Istanbul” qahvaxonasiga kelib, ayvonda o‘tirgan xo‘randalarni o‘qqa tutgan. Shundan so‘ng armiya jinoyatchilarga qarshi operatsiya boshladi, otishma yuzaga keldi.