Afsonaga ko‘ra Trevi favvorasiga tanga tashlagan odam albatta Rimga qaytib keladi. Agarda ikkita tashlansa — o‘z sevgisini uchratadi, uchta tashlasa — uni to‘y kutadi, to‘rtta esa — boylikdan dalolat.
Har yili millionlab turistlar XVIII asrda barokko usulida qurilgan favvoraga tashrif buyurib, deyarli barchasi baxt uchun u yerga choy-chaqa otadi. Suv ostida shu qadar ko‘p pul yig‘ilib qoladiki, xodimlar uni har kecha tozalashlariga to‘g‘ri keladi, deb xabar berdi Insider Pro.
2016-yilda Trevi favvorasidan 1,5 million dollar yig‘ib olingan. Barcha pullar katolik cherkovining xayriya fondlariga yo‘naltirilgan.
Balandligi 25,9 metr hamda eni 19,8 metr bo‘lgan favvorani qurishni 1762-yilda Nikola Salvi boshlagan, Juzeppe Pannini esa oradan 30 yil o‘tib uning ishini yakunlagan. Favvora nomi unga eltuvchi uchta ko‘cha nomidan kelib chiqqan (italyancha “tre vie”) — Via Dey Krochichchi, Via Poli hamda Via Delle Muratte.
Favvora yaqinda Italiyaning Fendi modalar uyi hisobiga rekonstruksiya qilingan edi. Ta’mirlash ishlariga 2,2 million dollar sarflangan.
Har kuni munitsipal ishchilari favvora suvining ostini tozalab, turistlar tashlagan tangalarni yig‘adi. Undagi tangalar bir necha ming dollarni tashkil etadi.
Yig‘ilgan tangalar tozalanadi, tortib ko‘riladi, sanaladi va xalqaro katolik notijorat tashkiloti Karitasga yuboriladi.
Getty Images’ning 2005-yildagi ma’lumotlariga ko‘ra, bir yil davomida favvoradan 600 ming dollarga yaqin pul yig‘ib olingan. 2016-yilda esa ushbu mablag‘ 1,5 million dollarga yetgan.
Avvallari favvorani oddiy o‘g‘rilar tunab ketgan. Bu ish Rim shahar kengashi ushbu faoliyatni noqonuniy deya topguniga qadar davom etgan.
Trevi favvorasiga nafaqat tangalar tashlanadi. Ba’zida u yerdan ko‘zoynak, diniy ramzlar va hatto tish protezlari ham chiqib turadi.
Izoh (0)