GM Uzbekistan kompaniyasi yaqin to‘rt yil ichida ikkita yangi yengil avtomobil modellarini ishlab chiqarishni o‘zlashtirishni rejalashtirmoqda. “Jahon” agentligi axborotiga ko‘ra, bu 2021-yilga qadar mo‘ljallangan Avtomobilsozlik sohasini rivojlantirish dasturida ko‘zda tutilgan.
“Afsuski, avtozavod 2020 va 2021-yillardan boshlab ishlab chiqarilishi kutilayotgan modellar nomini ma’lum qilmayapti”, — deb yozadi agentlik.
Biroq, ishlab chiqarish ko‘rsatkichlariga asoslanib xulosa qilinsa (modellarning biri yiliga 46 ming dona, ikkinchisi esa 43 ming dona ishlab chiqarilishi kutilmoqda), bu Captiva yoki Malibu kabi premium avto emas, balki C tasnifiga oid yangi sedanlar yoki budjet variantidagi avtomobillar bo‘lishi mumkin.
Agentlikning qo‘shimcha qilishicha, har ikkala loyihaning umumiy qiymati 270 million dollardan ziyod.
Eslatib o‘tamiz, avvalroq GM Uzbekistan Chevrolet Tracker’ni ishlab chiqarishi va uni O‘zbeiston Prezidenti Shavkat Mirziyoyev sinab ko‘rgani xabar qilingan edi.
Izoh (0)