Malika Diana halokatga uchragan Mercedes avtomobili bungacha ham yo‘l-transport hodisalari ishtirokchisi bo‘lgan va keyinchalik qayta tiklangan. Bu haqda Fransiyaning M6 telekanali orqali namoyish etilgan “Diananing halokati: aql bovar qilmas dalillar” filmida ma’lum qilindi, deya xabar beradi “RIA Novosti”.
Film ijodkorlariga ko‘ra, mashinaning ilk egasi yosh reklamachi Erik Buske bo‘lgan. U yangi Mercedes’ni 1994-yil sentabrida xarid qilgandi. Oradan bir necha oy o‘tib, mashinani o‘g‘irlab ketiladi. Avtomobil o‘g‘risi Parij yaqinida tezlikni juda yuqoriga ko‘taradi, biroq boshqaruvni uddalay olmay, mashinani dabdala qiladi.
Mercedes tiklab bo‘lmas holga kelgan, uni chiqitga chiqarish talab etilardi, biroq nimadir sabab bilan bunday bo‘lmadi. Buske sug‘urta kompaniyasidan tovon puli oldi.
Mercedes’ning keyingi egasi Parijning Ritz mehmonxonasi badavlat mijozlarini tashish uchun qimmatbaho mashinalar taqdim etadigan Etoile Limousines kompaniyasi bo‘ldi. Mehmonxona egasi Diananing do‘sti Dodi al-Fayedning otasi Muhammad al-Fayed edi.
Bu yerda avtomobil yana bir marotaba o‘g‘irlab ketiladi va uni ikki oy mobaynida topib bo‘lmaydi. Keyinchalik mashina trassa chetidan topildi, biroq uning jihozlari bir qismi yo‘q, elektronikasi shikastlangandi.
Malika Diana, Dodi al-Fayed va tansoqchi bo‘lgan avtomobil 1997 yil 31-avgustda oxirgi yo‘lga aynan Ritz avtoturargohidan jo‘nagandi. Tunneldan Mercedes’dan qolgan narsalar ikki konteynerda olib ketildi: birida shassi, ikkinchisida esa qolgan barcha qismlar to‘plangandi.
Rasmiy tergov natijalariga ko‘ra, avariyaga haydovchi Anri Pol avtomobilni mast holatda boshqargani asosiy sabab bo‘ldi.
Izoh (0)