Amerikaning Nyu-Jersi shtatida joylashgan Bernards shahri hukumati AQSh adliya vazirligining shaharda masjid qurishdan bosh tortish bilan bog‘liq da’vosini hal qilish uchun 3,25 million dollar to‘lashga rozi bo‘ldi, deb yozadi “TASS”.
Nyu-Jersi prokuraturasi bayonotiga ko‘ra, 2011-yilda shahardagi yer maydonini mahalliy musulmonlar tashkiloti sotib olgan. U Bernardsda masjid qurmoqchi bo‘lgan. Bundan xabar topgan shahar ma’muriyati bir qator sabablar, shu jumladan, masjidga mashinada kelgan tashrifchilar avtoturargohda joy yetishmovchiligini keltirib chiqarishini ro‘kach qilib, ruxsat bera olmasligini aytgan.
Qurilish haqida so‘rov berilganidan keyin ko‘p o‘tmay, Bernardsda diniy muassasalar qurilishiga aloqador qoidalarning ba’zilari qat’iylashtirildi. Shu munosabat bilan musulmon jamiyati hukumat ataylab islom diniga e’tiqod qiluvchilar manfaatlarini cheklab qo‘ymoqda deb hisoblab, sudga murojaat qildi. AQSh adliya vazirligi da’voni qo‘llab-quvvatladi.
Erishilgan kelishuvga ko‘ra, shahar ma’muriyati masjid qurilishiga ruxsat beradi, shuningdek, avvalroq kiritilgan qoidalarning ba’zilarini bekor qiladi. Ular to‘lashga rozi bo‘lgan 3,25 million dollarning 1,5 million dollari musulmon jamiyatiga beriladi, 1,75 million dollar esa ikkala tomon advokatlari xizmatlari uchun to‘lanadi.
Izoh (0)