1-may kuni Ostona aeroportida Afg‘onistonning Qozog‘istondagi sobiq elchisi Muhammad Farrux Barakiy qo‘lga olindi, deb yozadi Kazakhstan Today.
U xizmat muddati tugaganidan so‘ng Qobulga jo‘nab ketmoqchi bo‘lgan, ammo aeroportda kutilmagan vaziyatga tushib qolgan. Bojxonachilarning yuklari ichida nimalar borligi haqidagi savoliga u zardasi qaynab, “bomba bor” deya javob qaytargan. Sobiq elchining ehtiyotsizlik bilan aytgan gapi favqulodda choralar ko‘rilishiga olib kelgan.
Tezda aeoportga kirish eshiklari yopilgan, voqea joyiga 100 ga yaqin maxsus topshiriqli bo‘linma jangchilari yuborilgan. Uch soat davomida diplomat hibsda saqlangan, Qozog‘iston tashqi ishlar vazirligi xodimlari Barakiyga kafil bo‘lgach, unga yo‘lida davom etish uchun ruxsat berishgan.
Hodisani ijtimoiy tarmoqlarda izohlar ekan, sobiq elchi anglashilmovchilik uchun javobgarlikni aeroport ishchilari zimmasiga yukladi va unga yuk haqidagi savolni qayta-qayta berib, uning haziliga juda jiddiy munosabatda bo‘lishganini ta’kidladi.
Izoh (0)