Toshkent shahrida aliment to‘lovini undirish bo‘yicha nazorat kuchaytiriladi, deya xabar bermoqda “1news.uz” “Oila davrasida” gazetasiga tayanib. Ta’kidlanishicha, bu borada Toshkent shahri hokimligi, prokuratura, sud, adliya, ichki ishlar boshqarmasi va boshqa jamoat tashkilotlarining qo‘shma qarori qabul qilingan.
“Shunday kishilar borki, ular o‘ziga to‘q, yashash sharoiti yaxshi, ammo o‘z pushti kamaridan bo‘lgan bolasiga aliment to‘lashni istamaydi. Yoki o‘zini atayin oyligi kam bo‘lgan ishga rasmiylashtirib qo‘yadi, mavjud moddiy imkoniyatlarini yashirishga urinadi. Shu bois ana shu qo‘shma qaror ishlab chiqildi”, — deydi Toshkent shahri hokimi o‘rinbosari Mirzohid Obidov.
Qayd etilishicha, endilikda aliment undirish bo‘yicha davlat va jamoat tashkilotlari hamkorlikda ishlaydi. Aliment to‘lashga ishsizligini bahona qilayotgan fuqarolar ishga joylashtiriladi.
2016-yil 1-oktabr holatiga Toshkent shahri sud ijrochilari bo‘limlarida alimentga oid 22 mingga yaqin ijro hujjati bo‘lgan. 2016-yil sentabrdan boshlab sud qarorlarini ijro etish departamenti Toshkent boshqarmasiga virtual qabulxona orqali tushgan murojaatlarning 1524 tasi (45,1 foizi) aliment to‘lovini undirish masalasidadir.
Izoh (0)