General Motors tomonidan o‘tgan yili xarid qilingan Cruise Automation kompaniyasi avtopilotli mashina San-Fransisko ko‘chalari bo‘ylab harakatlanayotgani videosini e’lon qildi. Bu haqda “Motor” xabar bermoqda.
The Detroit News nashriga ko‘ra, avtopilot tizimi Chevrolet Bolt elektromobiliga o‘rnatilgan, avtomobilda esa mazkur harakatlanish davomida GM prezidenti Den Ammann bo‘lgan.
Rolikda avtopilotning yo‘ldagi turli vaziyatlarda o‘zini qanday tutishi ko‘rsatilgan: mashina yo‘l chetiga qo‘yilgan avtomobillarni aylanib o‘tadi, chiziqlarni almashtiradi, piyoda va velosipedchilarni o‘tkazib yuboradi, shuningdek, bekatdan jilayotgan avtobusni quvib o‘tish yoki o‘tmaslik haqida qaror qabul qiladi. Kompaniya elektromobilning harakatlanishi to‘liq avtonom tartibda, boshqaruviga inson aralashuvisiz amalga oshirilganini bildirmoqda.
Hozirda Cruise va GM Chevrolet Bolt asosidagi avtonom avtomobillarni nafaqat San-Fransisko, balki Skottsdeyl, Arizona va Michiganda ham sinovdan o‘tkazmoqda. Shuningdek, ishlab chiqaruvchi avtopilotli taksilar tarmog‘ini yaratish maqsadida Lyft servisi bilan hamkorlik qilmoqda.
Ma’lumot uchun, GM 2020-yilga kelib avtopilotli mashinalari seriyali tarzda ishlab chiqarilishini va’da qilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)