FVV Qamchiq dovonida qo‘mondonlik-shtab o‘quv mashqi o‘tkazdi
O‘zbekiston Respublikasi Favqulodda vaziyatlar vazirligi tomonidan 26—27-dekabr kunlari Qamchiq dovonida navbatdagi qo‘mondonlik-shtab o‘quv mashqi o‘tkazildi. Unga Namangan va Toshkent viloyatlari Favqulodda vaziyatlarda ularning oldini olish va harakat qilish Davlat quyi tizimi (FVDqT)ga kiruvchi xizmatlar boshqaruv organlari hamda kuch va vositalari jalb etildi. Bu haqda vazirlik matbuot xizmati xabar bermoqda.
O‘quv mashqi FVDqTga kiruvchi boshqaruv organlari va kuchlarini “Favqulodda vaziyatlar” rejimiga o‘tkazish hamda avariya-qutqaruv va boshqa kechiktirib bo‘lmas ishlarni olib borishni o‘z ichiga olgan bir necha bosqichlarda o‘tkazildi.
Shuningdek, mashg‘ulot doirasida bir qator o‘quv nuqtalarida maxsus-taktik mashqlar o‘tkazildi. Ularda qidiruv-qutqaruv ishlarini tashkil etish, vayronalar ostidan va yo‘l transport hodisasiga uchragan avtomobillardan jabrlanganlarni chiqarish, birinchi tibbiy yordam ko‘rsatish, aholini xavfsiz hududlarga evakuatsiya qilish tadbirlari amalda sinab ko‘rildi.
Joriy yilda bunyod etilgan “Angren—Pop” yo‘nalishida harakatlanuvchi temir yo‘lda yuzaga kelishi mumkin bo‘lgan favqulodda vaziyatlarning oqibatlarini bartaraf etish borasida amaliy mashq tashkil etildi. Dovonda, ayniqsa qishki mavsumda sodir bo‘lishi mumkin bo‘lgan turli favqulodda vaziyatlarning oldini olish va oqibatlarini bartaraf etish masalari ko‘rib chiqildi. Bunda asosan dovon bo‘ylab tashkil etilgan nazorat-kuzatuv postlarining hamkorlikdagi harakatlariga alohida e’tibor qaratildi.
Biriktirilgan hududlarda harakatlanayotgan avtotransport vositalarining xavfsiz harakatlanishlariga salbiy ta’sir ko‘rsatishi mumkin bo‘lgan kutilmagan vaziyatlarni tezkor bartaraf etish, harakatlanish xavfsizligini ta’minlash, bu borada qo‘shni postlar bilan hamkorlikni yo‘lga qo‘yish, ma’lumot almashinuvini ta’minlash va boshqaruv shtabiga o‘z vaqtida vaziyat to‘g‘risida axborot berib borish ishlari bajarildi.
Bu kabi tezkor tadbirlarni bajarishda eng zamonaviy avariya-qutqaruv maxsus texnikalar, asbob-anjomlardan keng foydalanildi, o‘quv mashqlariga malakali qutqaruvchilar jalb etildi. Ikki kun davomida o‘tkazilgan qo‘mondonlik-shtab o‘quv mashqining yakuniy muhokamasi dovonda barpo etilgan idoralararo tezkor shtab binosida bo‘lib o‘tdi. Unda kuzatuvchi va ekspertlar fikrlari tinglanib, tegishli xulosalar chiqarildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
