Rossiya 1990-yillardan buyon birinchi marta mudofaaga eng ko‘p pul sarflagan mamlakatlar beshligiga kirmadi, deb yozadi “RIA Novosti” Jane’s Defence Budget an’anaviy ma’ruzasiga tayanib.
Harbiy sanoatni modernizatsiya qilayotgan Hindiston Saudiya Arabistoni va Rossiyani ortda qoldirib, reytingda to‘rtinchi o‘rinni egalladi. Joriy yilda ushbu mamlakatning mudofaa byudjeti 50,7 milliard dollarni tashkil qildi, Rossiya esa mudofaaga 48,5 milliard dollar sarfladi. Ikkinchi va uchinchi o‘rinlarda Xitoy va Buyuk Britaniya joylashdi.
Birinchi o‘rinni band etgan AQShning xarajatlari 622 milliard dollarga teng bo‘ldi. AQShda byudjet qisqartirishlarining yakunlangani, shuningdek, G‘arbiy Yevropa mamlakatlarida olti yilda birinchi marta mudofaa xarajatlarining o‘sishi shunga olib keldiki, Rossiyada 1990-yillardan beri ilk marotaba bunday xarajatlar boshqa mamlakatlardagiga nisbatan kamaydi, deyiladi maqolada.
Hisobotni tuzadigan ekspertlar fikricha, 2018-yilga kelib, eng katta harbiy byudjetli mamlakatlar beshligiga AQSh, Xitoy, Hindiston, Buyuk Britaniya va Saudiya Arabistoni kiradi.
Izoh (0)