Kris Evans ketma-ket ikkinchi yil eng ko‘p daromad keltirgan aktyor deb topildi

Forbes jurnali Gollivud aktyori Kris Evansni 2016-yilning eng ko‘p daromad keltirgan aktyori deb topdi. Bu haqda TJournal xabar bermoqda.

Jurnal mualliflarining ta’kidlashicha, u bunday muvaffaqiyatga Marvel studiyasi tomonidan suratga olingan yagona film tufayli erishgan. “Birinchi qasoskor: Qarama-qarshilik” kartinasini suratga olishda aktyor uchun sarflangan har bir dollar o‘rtacha 135,8 dollar daromad keltirganligi ta’kidlanmoqda. Byudjeti 250 million dollarni tashkil etgan film prokatda 1 milliard dollardan ortiq pul ishlab topdi.

2016-yilda “Qoyilmaqom yettilik” va “Yo‘lovchilar” ilmiy-fantastik filmida suratga tushgan aktyor Kris Pratt reytingning ikkinchi o‘rnidan joy oldi. “Yura davri olami” kartinasi aktyor muvaffaqiyatining asosiy qismini ta’minladi. Uni suratga olishda Kris uchun sarflangan har bir dollar 125 dollar daromad keltirdi.

Reytingdan, shuningdek, Skarlett Yoxannson (3-o‘rin) va kichik Robert Dauni (8-o‘rin) joy egalladi.

Bir yil oldin Kris Evans “Qasoskorlar: Altron Erasi” va “Birinchi qasoskor: Boshqa urush” filmlari bilan kinostudiyalarga har bir sarflangan dollar uchun 181,8 dollar foyda keltirgandi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.