O‘zbekiston Respublikasi Prezidentining shu yil 28-noyabrdagi Farmoni bilan “O‘zbekiston Respublikasi Qurolli Kuchlariga 25 yil” esdalik nishoni ta’sis etildi. Bu haqda “Gazeta.uz” xabar bermoqda.
Farmonda keltirilishicha, esdalik nishoni O‘zbekiston Qurolli Kuchlarining 25 yilligini nishonlash, davlatning mudofaa qobiliyatini mustahkamlash va Qurolli Kuchlarni barpo etishga salmoqli hissa qo‘shgan harbiy xizmatchilar, Qurolli Kuchlar faxriylari va xizmatchilarini qo‘llab-quvvatlash maqsadida ta’sis etildi.
Esdalik nishoni bilan mamlakat mudofaa qudratini mustahkamlash va Qurolli Kuchlarni barpo etishga salmoqli hissa qo‘shgan shaxslar, yuqori professional mahorati, harbiy va vatanparvarlik burchiga sadoqatini namoyon etgan harbiy xizmatchilar, jumladan, O‘zbekiston mustaqilligi va hududiy yaxlitligini himoya qilish bo‘yicha jangovar harakatlarda ishtirok etgan, zaxiraga bo‘shatilgan yoki iste’foga chiqarilgan harbiy xizmatchilar, shuningdek, harbiy hamda xizmat burchini bajarishda halok bo‘lgan yoxud yarador bo‘lgan va shikastlangan O‘zbekiston Qurolli Kuchlarining harbiy xizmatchilari taqdirlanadi.
Esdalik nishoni 0,25 mikron qalinlikdagi oltin bilan qoplangan mis qotishmasidan tayyorlanadi va diametri 34 millimetrli doira shaklida bo‘ladi. Esdalik nishonining old tomoni markazida taralayotgan quyosh nurlari fonida Amir Temur haykali tasvirlangan. Uning orqa tomonida Shahrisabz shahrida joylashgan qadimgi Oqsaroy majmuasi peshtoqi aks ettirilgan. Esdalik nishonining yuzasida tasvirlangan haykalning o‘ng va chap tomonida O‘zbekiston Qurolli Kuchlari tashkil etilgan yil va yubiley yili (1992 — 2017) raqamlari aks ettirilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)