Rossiya mudofaa vazirligi Ukrainaning Qrimdagi harbiy mashg‘ulotlari chog‘ida javob choralari haqida bildirishnoma joyladi, deb yozadi Meduza. NOTAM talabnomasi AQSh Fuqarolik aviatsiyasi boshqarmasi tizimida A3064/16 raqami ostida paydo bo‘ldi.
Bildirishnoma matnida aytilishicha, 1—2-dekabrga belgilangan harbiy mashg‘ulotlar doirasida Simferopol va Odessa parvoz axboroti hududida aniqlangan raketalar Rossiyaning havo hujumiga qarshi tizimlari tomonidan urib tushiriladi.
“Agar uchirilgan raketalar ushbu hududda (quruqlikda, dengizda yoki havo makonida) Rossiya obyektlari uchun xavf tug‘dirsa, parvoz qurilmalarini yo‘q qilish uchun javob zarbasi beriladi”, — deyiladi bildirishnomada.
Bildirishnomaning amal qilish vaqti — 1-dekabr, payshanba kuni Moskva vaqti bilan 12:30 dan 14:30 gacha (Toshkent vaqti bilan 14:30 dan 16:30 gacha).
Bundan tashqari, Ukraina raketalari xavf tug‘dirgan holda, ularni urib tushirishga tayyorlik haqida Rossiya prezidenti matbuot kotibi Dmitriy Peskov ham ma’lum qilgan.
25-noyabr kuni Ukraina Qora dengiz akvatoriyasi ustida raketa uchirishi haqida e’lon qildi. Kiyev parvozlar uchun Rossiya havo hududiga kiruvchi cheklov zonasini belgiladi. Shu bilan birga, Ukrainadagilar Qrimning Kerch bo‘g‘ozigacha bo‘lgan butun havo hududi o‘zlariga tegishli deb hisoblashini ta’kidladi.
Izoh (0)