Belgiya va Niderlandiya mamlakatlar o‘rtasidagi chegarani soddalashtirish uchun Maas daryosi bo‘yida joylashgan kichikroq yer uchastkalarini bir-biriga berishga rozi bo‘ldi. Bu haqda 29-noyabr, seshanba kuni The Guardian nashri ma’lum qildi, deb yozadi “Interfaks”.

Almashuv teng kuchli emas, Niderlandiya uch gektar yerni bergan holda, 16 gektarni qo‘lga kiritmoqda.

Daryo bo‘ylab chegara 1830-yilda Belgiya mustaqillikni qo‘lga kiritgandan so‘ng belgilangan edi. Biroq 1961-yilda kemalar qatnovini yengillashtirish uchun daryo o‘zani sun’iy ravishda to‘g‘rilangan. Buning oqibatida har ikkala mamlakat yerlarining bir qismi qarama-qarshi sohilda qolgan. Shuning uchun hozirda bir davlatdan boshqasiga chegarani buzmasdan faqat qayiqda o‘tish mumkin.

Tashqi ishlar vazirlari tomonidan 28-noyabr, dushanba kuni imzolangan bitim 2018-yilda Belgiya va Niderlandiya parlamenti tomonidan ratifikatsiya qilingandan keyin rasman kuchga kiradi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.