“O‘zbekiston Respublikasi Prezidenti saylovi to‘g‘risida”gi qonunda saylov kuni o‘z yashash joyida bo‘lmaydigan saylovchi muddatidan oldin ovoz berish huquqiga egaligi ko‘rsatilgan. Bu haqda O‘zA xabar bermoqda.
Muddatidan oldin ovoz berish saylovga 10 kun qolganda boshlanadi va saylovga bir kun qolganida to‘xtatiladi. Muddatidan oldin ovoz berishni o‘tkazish vaqti okrug saylov komissiyasi tomonidan belgilanadi va saylovchilarning, kuzatuvchilarning, OAV vakillarining e’tiboriga yetkaziladi.
Muddatidan oldin ovoz berishni amalga oshirish uchun saylovchi saylov kunida bo‘la olmasligi sabablari (ta’til, xizmat safari, chet elga chiqish va hokazo) ko‘rsatilgan ariza asosida o‘z yashash joyidagi uchastka saylov komissiyasidan saylov varaqasini oladi. Saylovchi saylov varaqasini olganligi haqida uchastka saylov komissiyasining kamida ikki nafar a’zosi hozirligida saylovchilar ro‘yxatiga imzo chekadi.
Saylov varaqasi maxsus jihozlangan yashirin ovoz berish kabinasida yoki xonasida saylovchi tomonidan to‘ldiriladi. Saylovchi qaror qabul qiladi va to‘ldirilgan saylov varaqasini yopiq konvertda uchastka saylov komissiyasida qoldiradi. Konvertning yelimlangan joyiga uchastka saylov komissiyasi ikki nafar a’zosining imzolari qo‘yilib, ular komissiyaning muhri va saylovchining imzosi bilan tasdiqlanadi.
Qonunning ushbu talablari asosida mamlakatning barcha saylov okruglarida muddatidan oldin ovoz berish tartibi belgilandi. Masalan, 14-Toshkent shahar saylov okrugi qaroriga ko‘ra, 2016-yil 24-noyabrdan 2-dekabrgacha Toshkent shahrida saylovchilarning muddatidan oldin ovoz berishi belgilangan. Ovoz berish belgilangan kunlarda soat 9:00 dan 18:00 ga qadar o‘tkaziladi.
Jumladan, 24-noyabr kuni poytaxtning Uchtepa tumanida joylashgan 34-saylov uchastkasida ayrim fuqarolar muddatidan oldin ovoz berdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)