O‘zbekiston faxriy donorlariga pul mukofoti beriladigan bo‘ldi
O‘zbekiston hukumatining 27-oktabrdagi qarori bilan, O‘zbekiston faxriy donori ko‘krak nishoni to‘g‘risidagi Nizomga o‘zgartirish va qo‘shimcha kiritildi. Bu haqda Norma xabar bermoqda.
“O‘zbekiston Respublikasi faxriy donori” ko‘krak nishoni bilan mukofotlangan shaxslarga endi eng kam oylik ish haqining besh baravari miqdorida bir martalik pul mukofoti ham topshiriladi.
Bungacha faxriy donor ko‘krak nishoni bilan taqdirlangan shaxslarga pul mukofoti berilishi nazarda tutilmagan edi.
Ma’lumot uchun, “O‘zbekiston Respublikasi faxriy donori” ko‘krak nishoni bilan o‘z qonini kamida 40 marta yoki uning tarkibiy qismlaridan bir qismini kamida 60 marta bepul topshirgan fuqarolar mukofotlanadi.
Ko‘krak nishoni, unga guvohnoma va bir martalik pul mukofoti Jahon donor kunida — 14-iyunda tantanali vaziyatda topshiriladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
