Janubiy Koreya prezidenti kotibiyatda o‘zgarishlarni amalga oshirdi

Janubiy Koreya prezidenti Pak Kin Xe o‘z kotibiyatida kadr o‘zgarishlarini amalga oshirdi. Bu haqda “TASS” xabar bermoqda.

Davlat rahbari sobiq prokurorni fuqarolik ishlari bo‘yicha kotib, Milliy kengashning sobiq spikerini esa ijtimoiy masalalar bo‘yicha kotib etib tayinladi.

Shuningdek, Pak Kin Xe ma’muriy masalalar, prezidentning shaxsiy masalalari hamda jamoatchilik bilan aloqalar bo‘yicha kotiblarni iste’foga chiqardi. Ular korrupsion janjallarga aralashib qolgan Chxve Sun Sil bilan aloqadorlikda gumonlanayotgan edi. Uch amaldor ham iste’foni qabul qildi.

Mazkur o‘zgarishlar prezidentning dugonasi, uning saylov kampaniyasiga yaqindan yordam bergan Chxve Sun Sil aralashib qolgan korrupsion janjal bilan bog‘liqligi aytilmoqda. Chxve Sun Sil o‘z mavqeidan foydalangan holda yirik kompaniyalarni unga aloqador ikki jamg‘armaga ko‘p millionli ehsonlar qilishga majburlaganlikda ayblanmoqda. Ayrimlar, o‘z navbatida, Pak Kin Xeni dugonasining bu ishlariga yo‘l qo‘yib berganlikda gumon qilmoqda.