Grozniyda qurilayotgan Yevropadagi eng baland bino uchun 1 mlrd dollar sarflanishi ma’lum qilindi

Checheniston poytaxtidagi “Axmat-Tauer” minorasi qurilishining yakuniy qiymati 1 milliard dollarga boradi. Bu haqda shahar meri Muslim Xuchiyev ma’lum qildi, deya xabar beradi “RBK”.

Bu avval e’lon qilingan summadan ko‘ra ikki barobar ko‘p. Osmono‘par bino qurilishi qimmatlashgani sababi ma’lum qilinmadi. Xuchiyevga ko‘ra, uni bunyod etishga budjet mablag‘lari sarflanmagan, barchasi xususiy investitsiyalar hisobiga amalga oshirilmoqda.

102 qavatli “Axmat-Tauer”ning balandligi 435 metrga boradi. Qurilishi yakunlangandan so‘ng minora Yevropadagi eng baland binoga aylanishi kutilmoqda.