Rossiya Premyer-Ligasining “Orenburg” klubi sharafini himoya qilayotgan o‘zbekistonlik futbolchi Vadim Afonin bilan suhbat “Championat.asia” saytida chop etildi.
O‘z vaqtida Toshkentning “Traktor” va G‘uzorning “Sho‘rtan” klublarida to‘p surgan Afonin suhbat chog‘ida quyidagi fikrlarni bildirdi:
“‘Orenburg’da legioner futbolchi hisoblanaman. Axir men O‘zbekiston milliy terma jamoasi safida maydonga tushganman”.
Suhbat davomida Vadim Afoninga O‘zbekiston terma jamoasidagi birinchi va shu bilan birga oxirgi bo‘lgan yagona o‘yini eslatib o‘tilgan:
“Adashmasam, o‘rtoqlik o‘yini edi. Keyin Eron ustidan zafar quchilgan o‘yin oldidan murabbiylar meni maydonga tushishi mumkin bo‘lgan futbolchilar qatoriga kiritishdi. O‘shanda Eronni 1:0 hisobida mag‘lub etgandik. Janubiy Koreya bilan 2:2 hisobida durang o‘ynaganimizda ham ro‘yxatda bor edim”.
“Har qanday futbolchi xalqaro maydonda yurt sha’nini himoya qilishni o‘ylaydi. Bu xohish menda ham bor. Agar terma jamoa murabbiylari meni chaqirishsa, buni jonim bilan qabul qilib, O‘zbekistonga uchib kelaman”.
Suhbat davomida Vadim Afonin terma jamoa bosh murabbiyi Samvel Babayan ham, uning yordamchilari ham bosh jamoaga jalb qilish taklifi bilan chiqmaganliklari haqida aytib o‘tgan.
Rossiya Premyer-Ligasida to‘p suradigan Odil Ahmedov hamda Vitaliy Denisov bilan qo‘ng‘iroqlashib turish borasidagi savolga Vadim Afonin faqatgina o‘zaro o‘yinlarda ko‘rishishlari bilan javob qaytargan. Rossiya to‘p surayotgan Vagiz Galiulin bilan esa suxbatlashib turishlarini bildirgan.
Vadim Afonin “Orenburg” klubining Premyer-Ligaga qadam qo‘yishida mehnat qilgan 29 yoshli futbolchi hisoblanadi. U chempionatning ortda qolgan to‘qqiz turi davomida sakkiz bor maydonga tushgan.
Izoh (0)