Hayotdan ko‘z yumgan shotlandiyalik sportchini nokautga uchratgan bokschi javobgarlikni his qilayotganini bildirdi
Shotlandiyalik bokschi Mayk Touellning o‘limidan oldin uni nokautga uchratgan Deyl Evans bo‘lib o‘tgan voqea uchun javobgarlikni his qilayotganini ma’lum qildi. Bu haqda “TASS” xabar bermoqda.
29-sentabr kuni Deyl Evans Mayk Touellga qarshi jangning beshinchi raundida uni nokautga uchratdi. Og‘ir zarbalar qabul qilgan Touell zambilda olib chiqildi va shifoxonaga yetkazildi. Biroz vaqt o‘tib, 25 yoshli bokschi bosh miya jarohatlari oqibatida vafot etdi.
“Bo‘lib o‘tgan voqea uchun javobgarlikni his qilyapman, chunki biz bir-birimizni uramiz. Umrim davomida ushbu dahshatli hissiyot bilan yashashga majburman. Hozir uni bu hayotda boshqa ko‘ra olmaydigan ikki yashar o‘g‘li, uning sevgan qizi va oilasi haqida o‘ylayapman”, – dedi Evans.
Deyl Evans, shuningdek, faoliyatini yakunlab, boksdan ketish haqida o‘ylaganini ma’lum qildi. Endi esa u Touellning xotirasiga bag‘ishlab Buyuk Britaniya chempioni bo‘lmoqchi.
Mayk Touellning o‘limidan so‘ng britaniyalik deputat boks qoidalari o‘zgartirilishini talab qildi. Qator tashkilotlar esa boksni umuman bekor qilish taklifini bildirdi.
