Filippinlik taniqli bokschi, mamlakat Senati a’zosi Menni Pakyao barcha turdagi narkotik moddalarni iste’mol qilganini tan oldi. Bu haqda “TASS” xabar bermoqda.
Pakyao Filippin prezidenti Rodrigo Dutertening giyohvand moddalarga qarshi kampaniyasini qo‘llab-quvvatlashini ta’kidladi. So‘nggi oylarda o‘tkazilayotgan kampaniya davomida narkobiznesga aloqador 3,5 ming nafarga yaqin kishi yo‘q qilindi.
“Prezident giyohvand moddalarni iste’mol qilish tajribam haqida bilmaydi. Men barcha turdagi gihyovand moddalarni iste’mol qilganman”, — dedi bokschi.
Pakyao, shuningdek, prezident Rodrigo Duterteni narkobiznesga aloqador kishilarning o‘limida ayblash adolatdan emasligini ta’kidladi.
“Avvalgi hukumat davrida odamlar qonunni, mamlakat yetakchisi va hukumatini hurmat qilmas edi. Duterte esa qonunlarni himoya qilish kerakligini odamlar yuragi va ongiga singdirmoqchi”, — dedi Pakyao.
37 yoshli Menni Pakyao boks bilan 12 yoshdan shug‘ullanishni boshlagan. Uning bokschilik faoliyati 21 yildan beri davom etmoqda. Faoliyati davomida u sakkiz vazn toifasida chempion bo‘lgan.
Professional ringda 66 jang o‘tkazgan filippinlik bokschi 58 ta (shulardan 38 tasi nokaut bilan) g‘alabaga erishgan, 6 marta mag‘lub bo‘lib, 2 ta durang qayd etgan. Pakyao bokschilik faoliyati davomida 500 million dollarga yaqin daromad topgan.
Izoh (0)