France Presse agentligi Shimoliy Koreyada o‘z byurosini ochdi

Agence France Presse xalqaro axborot agentligi Shimoliy Koreyada o‘z byurosini ochdi. Bu haqda Meduza xabar bermoqda.

AFP KXDRning rasmiy axborot agentligi — Koreya markaziy telegraf agentligi bilan bitim tuzgani sabab, ushbu mamlakatda o‘z bo‘limini ochishga muvaffaq bo‘lgan.

Mazkur bitim sharofati bilan, AFP Shimoliy Koreyaga muntazam ravishda yozuvchi jurnalistlarni, fotomuxbirlarni va videooperatorlarni yuborish imkoniyatini qo‘lga kiritadi.

Bundan tashqari, KXDRda AFP’da tahsil ko‘rgan shimoliy koreyalik fotosuratchi va videochi ham faoliyat olib boradi (videochi muntazam ravishda videoma’lumotlarni tayyorlab berishi zarur).

Shimoliy Koreya hamon jurnalistlar uchun eng yopiq mamlakatlardan biri hisoblanadi. Jahon axborot agentliklari orasida hozirgacha faqat Associated Press’ning KXDRda vakolatxonasi bor edi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.