Pokistonda Usoma bin Lodinni yo‘q qilish bo‘yicha operatsiya ishtirokchisi, AQSh harbiy-dengiz kuchlari maxsus bo‘linmasi sobiq jangchisi Mett Bissonett maxfiy ma’lumotni oshkor etmaslik haqida imzolagan kelishuvni buzgani uchun 6,6 million dollar to‘laydi. Bu haqda “TASS” xabar bermoqda.
AQSh rasmiylari 2012-yilda Bissonettning maxsus bo‘linma tomonidan “birinchi raqamli terrorchi”ni bartaraf etish bo‘yicha o‘tkazilgan operatsiya to‘g‘risida batafsil hikoya qilingan “Oson bo‘lmagan kun” kitobi chop etilgach, unga qarshi da’vo qo‘zg‘agandi. Sobiq harbiy Mark Ouen taxallusi ostida e’lon qilingan kitobi chiqishi oldidan AQSh mudofaa vazirligi va boshqa tegishli muassasalarga unda maxfiy ma’lumotlar bor-yo‘qligini tekshirishga imkon bermaganlikda ayblandi.
Rasmiylar bilan erishilgan kelishuvga muvofiq, Bissonett kitob sotuvidan olingan daromadga teng mablag‘ — 6,6 million dollarni yaqin 4 yil mobaynida to‘lab beradi.
Eslatib o‘tamiz, Usoma bin Lodin 2011-yil 2-may kuni Amerika maxsus bo‘linmasi Pokistonning Abbotobod shahrida o‘tkazgan maxfiy operatsiyasi davomida o‘ldirilgandi.
Izoh (0)