“Siferblat” kafe tarmog‘ining asoschisi chitalik qizga Facebook’dagi mashhurligini oshirish uchun 40 ming rubl to‘ladi
Rossiyadagi “Siferblat” kafe tarmog‘ining asoschisi Ivan Mitin Facebook’da mashhurligini oshirish maqsadida Like (“Yoqtirish” – “Daryo” izohi) tugmasini bosib o‘tirish uchun maxsus odamni ishga oldi. Ammo u haqiqatni oshkor qilganida, Ivan Mitinning Facebook’dagi yangi “tanishlari” uni do‘stlari ro‘yxatidan o‘chirib tashladi. TJournal voqea haqida batafsil hikoya qilib berdi.
Ivan Mitin bahor so‘ngida ijtimoiy tajribani yo‘lga qo‘ydi – notanish insonlarning Facebook’dagi sahifasida qoldirilgan postlarga Like bosib, shu orqali ulardan ham shunday javob olishga qaror qildi.
Mitin begonalarning sahifasidagi postlarga Like bosish uchun o‘z vaqtini sarflash samarasiz deb hisobladi va HeadHunter saytidan bu ishni oyiga 20 ming rubl uchun bajaradigan chitalik qizni ishga yolladi. Like bosuvchi qiz uchun Mitin kimlarga ko‘proq Like bosish va qanday izohlar yozish haqida maxsus ko‘rsatmalar tayyorlab qo‘ydi.
Mitinning ma’lum qilishicha, ushbu tajriba 2 oy davom etdi va u 7-avgust kuni Facebook’dagi sahifasida tajriba muvaffaqiyatli o‘tganini qayd etdi.
Biroq haqiqat ma’lum qilinganidan ikki kun o‘tib 1 000 ga yaqin foydalanuvchi Mitinni o‘z do‘stlari ro‘yxatidan o‘chirib tashladi. Uning aytishicha, auditoriya qilingan ishni noto‘g‘ri tushundi. Aslida u qizni ish bilan ta’minlab, sahovatli ish qilganini bildirdi.
Tajriba muallifi foydalanuvchilarga qat’iy talab qo‘ydi: ular uni yo do‘stlari ro‘yxatiga qaytib qo‘shadi, yoki qizni ishdan bo‘shatadi.
Mitinning g‘oyasi jiddiy bo‘lganmi yoki yo‘q, noma’lum. 2015-yilning noyabr oyida Mitin jurnalistlarni faktlarni tekshirmaslikda ayblab, “TVS” telekanalini kalaka qilgandi. Ishbilarmonning do‘stlari Mitinning bunday fe’l-atvori odatiy ekanini aytdi. 2016-yilda “Siferblat” asoschisi boshqa voqea haqida so‘zlab bergandi: sobiq xotini bilan ajrashganidan so‘ng u mol-mulkini bo‘lishayotgan vaqtida hatto birga yuritgan Instagram sahifasini ham bo‘lishishiga to‘g‘ri kelgandi. Yakunda esa Mitin sahifani sobiq turmush o‘rtog‘iga berib, o‘ziga yangi sahifa ochdi.
