Iroqda iyuldagi terakt qurbonlari soni 324 kishiga yetdi

Bag‘dodda 3-iyulga o‘tar kechasi yuz bergan portlash qurbonlarining soni 324 nafarga yetdi. Bu haqda Reuters agentligi Iroq Sog‘liqni saqlash vazirligi rahbari Adil Xamudning ma’lumotiga tayanib ma’lum qildi, deya xabar bermoqda “Korrespondent.net”.

Avvalroq 292 kishining halok bo‘lganligi ma’lum bo‘lgan edi.

Qurbonlarning soni o‘sishda davom etishi mumkin, chunki hozircha barcha jasadlar identifikatsiya qilinmagan.

Eslatib o‘tamiz, portlovchi qurilmalar joylangan yuk mashinasi Bag‘dodning odam gavjum El-Karrada tumanida ishga tushirilgan. Portlash oqibatida asosan mahalliy kafening tashrif buyuruvchilari halok bo‘lgan. Biroz vaqtdan so‘ng shaharning shimolida yana bir portlash yuz bergan.