Shaxmat bo‘yicha bir necha karra jahon va Osiyo chempionlari aka-uka Javohir va Islombek Sindarovlarning ukasi — yetti yoshli Humoyun Sindarov Eronning Tehron shahri mezbonlik qilayotgan maktab o‘quvchilari o‘rtasidagi XII Osiyo chempionatida eronlik Ali Abbospur, Hojibadi Amr Husayn, xitoylik Gong Sunle, mo‘g‘ulistonlik Teninbold Batulga, Sodviling Noranbuld, shri-lankalik Dissanyake Emallarni dog‘da qoldirib, yetti imkoniyatdan yetti ochko bilan Osiyo chempionligini qo‘lga kiritdi. Bu haqda “Daryo”ga shaxmat bo‘yicha Respublika ixtisoslashtirilgan bolalar va o‘smirlar sport maktabi ma’muriyati ma’lum qildi.
Shu guruhda ishtirok etayotgan yana bir o‘zbekistonlik yosh shaxmatchi — Alixon Avazxonov olti ochko bilan kumush medalga sazovor bo‘ldi.
Chempionatning yetti yoshgacha qiz bolalar guruhida ham o‘zbekistonlik shaxmatchilar muvaffaqiyat qozondi. Tezkor shaxmat musobaqalarida mag‘lubiyatsiz dona surgan samarqandlik Afruza Hamdamova Osiyo chempioni unvonini qo‘lga kiritdi. Toshkent vakilasi Nozima Valiyeva esa shohsupaning ikkinchi pog‘onasini band etdi.
To‘qqiz yoshgacha o‘g‘il bolalar guruhida dona surayotgan Rasulbek Abdullayev bronza medalini qo‘lga kiritdi.
Ayni kunlarda klassik shaxmat bo‘yicha muobaqalar davom etmoqda.
Izoh (0)