O‘zbekistonda spirtli ichimliklar idishiga uning zarari haqida yoziladi
O‘zbekistonda alkogol mahsulotlari yorliqlariga nisbatan yangi talablar belgilandi, deb yozadi UzDaily.
O‘zbekiston standartlashtirish, metrologiya va sertifikatlash agentligi bosh direktori buyrug‘iga ko‘ra, O‘zbekiston hududidagi korxonalar tomonidan chiqariladigan alkogol mahsulotlariga muvofiqlik belgisini qo‘yish tartibiga o‘zgartirish kiritildi.
Buyruq 2016-yil 4-iyuldan kuchga kiradi. Yangi talablarga ko‘ra, alkogol mahsulot yorlig‘i yuqori sifatli qog‘ozdan, ro‘yxatdan o‘tgan poligrafik korxonalar tomonidan tayyorlangan bo‘lishi kerak. Yorliqlar chet eldan import qilinishi ham mumkin.
Buyruqqa muvofiq, butilkalarda alkogolning organizm uchun zarari haqida ogohlantiruvchi yozuvlar paydo bo‘ladi. Bunday tibbiy ogohlantirish yorliq asosiy maydonining kamida 40 foizini egallashi va quyidagi matnni o‘z ichiga olishi kerak: “Alkogol mahsulotini suiiste’mol qilish asab tizimi va ichki organlarda jiddiy kasalliklarni keltirib chiqaradi”.
