Gollandiyalik futbol mutaxassisi Gus Xiddink Rossiya futbol ittifoqining mamlakat terma jamoasini yana boshqarish taklifini rad etdi. Bu haqda Times nashriga tayanib, “TASS” xabar bermoqda.
2008-yilgi Yevropa chempionatida Rossiya terma jamoasi Gus Xiddink qo‘li ostida yarim finalga qadar yetib borgandi.
Rossiya terma jamoasi Yevro–2016 turniri guruh bosqichida omadsiz ishtirok etib, so‘nggi o‘rinni egalladi va musobaqa bilan xayrlashdi. Shundan so‘ng, 2015-yilning avgust oyidan buyon terma jamoa bosh murabbiyi lavozimida ishlab kelayotgan Leonid Slutskiy o‘z lavozimini tark etdi.
Gus Xiddink NOS nashriga bergan intervyusida Rossiya termasiga yordam berish uchun tayyor ekanini bildirgani haqida xabar qilingandi.
Biroq Times nashri 69 yoshli gollandiyalik mutaxassis Rossiya futbol ittifoqining taklifini rad etib, Angliya termasini boshqarish niyati bor ekanini ma’lum qildi. O‘z navbatida Angliya futbol assotsiatsiyasi Roy Xojsonning iste’fosidan so‘ng Gus Xiddink bilan hamkorlik qilishga qiziqayotganini ta’kidladi.
Izoh (0)