Toshkentning “Oqtepa” klubi o‘z safiga Roberto Badjoni qo‘shib oldi. Shartnoma shartlari va uning qanchaga mo‘ljallangani oshkor etilmagan.
Qashqadaryo viloyatining Shahrisabz tumanida tavallud topgan Roberto Badjo Nomozov “Oqtepa”ning Toshkent shahar 2-ligasidagi jamoasi a’zosi hisoblanadi. U 1995-yilning 14-aprel sanasida tavallud topgan.
Roberto Badjo Nomozovning otasi Turdimurod aka o‘z farzandiga katta ehtimol bilan italiyalik mashhur futbolchi Roberto Badjoning ismini berishni niyat qilgan. Ma’lumot uchun, o‘zbekistonlik Roberto Badjo italiyalik Roberto Badjoning mashhur penalti zarbasidan 3 kuni kam 9 oydan keyin dunyoga kelgan.
1994-yilgi Jahon Chempionatining finalida Roberto Badjo o‘yindan keyingi penaltilar seriyasidagi so‘nggi zarbani noaniq yo‘llab, Braziliyaning Jahon Kubogiga ega chiqishiga sabab bo‘lgandi.
Shunga qaramay, Roberto Badjo Italiya termasining finalga qadar yetib kelishiga katta hissa qo‘shgan. Nimchorak finalning Nigeriyaga qarshi o‘yinida 88-daqiqada gol urib, “skuadro adzurra”ni mag‘lubiyatdan qutqarib qolgan, 102-daqiqada esa penaltidan foydalanib, “oltin gol”i bilan Italiyani chorak finalga olib chiqqan.
Chorak finalda Italiya terma jamoasi Ispaniyani 2:1 hisobida mag‘lub etgan, Roberto Badjo bu safar ham 88-daqiqadagi goli bilan jamoasiga g‘alaba keltirgan. Bolgariyaga qarshi yarim finalda esa bir yo‘la dubl qayd etib, “moviy gvardiyachilar”ni final sari yetaklagan.
Mana shu voqealardan 9 oy o‘tib, Qashqadaryoning Shahrisabz tumanida o‘zbekistonlik Roberto Badjo tug‘ilgan.
Eslatib o‘tamiz, bungacha o‘zbek oilalarida tug‘ilgan bolalarga Bryus Li, Chingachkuk, Messi, Maradona, Neymar, Devid Bekxem, Ronaldo, Jumong, Ishani va boshqa mashhur kino hamda serial qahramonlari, futbolchilarning ism-shariflari qo‘yilgani haqida xabarlar berilgandi.
Ma’lumot uchun, kecha — 1-iyun kuni PFL rasmiy sayti “Oqtepa” klubining moliyaviy muammolar sabab O‘zbekiston 1-ligasidan rasman chetlashtirilgani haqida xabar qilgandi.
Izoh (0)