Ruslan Chagayev va Lukas Braun o‘rtasida bo‘lib o‘tgan jang natijasi bekor qilindi

Butunjahon boks assotsiatsiyasi (WBA) prezidenti Jilberto Xesus Mendosa 5-mart kuni o‘zbekistonlik Ruslan Chagayev hamda avstraliyalik Lukas Braun o‘rtasida o‘tkazilgan jang yuzasidan rasmiy bayonot berdi. Tashkilot rahbari WBA muntazam chempionlik kamari uchun kechgan jang natijasi bekor qilinganini ma’lum qildi, deb xabar bermoqda “Olamsport”.

• Takroriy doping testi ijobiy chiqqan Lukas Braun chempionlik kamaridan mahrum etildi

5-mart kuni Grozniy shahrida tashkil etilgan chempionlik jangi rasman o‘tkazilmagan deb topildi. Ruslan Chagayev faoliyatidagi mag‘lubiyatlar ustunidagi 3 soni rasman 2 soniga almashtirildi va chempionlik kamari o‘zbekistonlik bokschiga qaytarildi.

• Ruslan Chagayev va Lukas Braun o‘rtasidagi jang oldidan Yulduz Usmonova O‘zbekiston madhiyasini jonli ijro etdi (video)

Eslatib o‘tamiz, o‘sha jangda katta ustunlikka ega bo‘lgan Ruslan Chagayev 10-raundda texnik nokaut bilan mag‘lubiyatga uchragan edi. Jangdan so‘ng olingan har ikki doping tekshiruvi Lukas Braunning qoni tarkibida taqiqlangan klenbuterol moddasi borligini tasdiqladi.

• Lukas Braun dopingga aloqasi yo‘qligini tasdiqlash uchun yolg‘on detektorida sinovdan o‘tdi

Shu tariqa, avstraliyalik bokschi rasman WBA muntazam chempionlik kamaridan mahrum etildi. Endilikda Ruslan Chagayev ushbu chempionlik kamarini Fres Okendoga qarshi jangda himoya qilishi kerak bo‘ladi.