Buyuk Britaniyaning Lids shahrilik biznesmen Adam Leyton xayriya aksiyasi doirasida 24 soat davomida Yevropadagi 12 davlatda bo‘lib qaytdi. Mazkur sayohat chog‘ida u 1,3 ming yevro mablag‘ to‘plashga muvaffaq bo‘ldi, deya hikoya qiladi The Daily Mail.
Leyton sayohatini 25-may kuni mahalliy vaqt bilan ertalabki yettida Germaniyaning Perl kommunasida boshlab, yaqin atrofda joylashgan Lyuksemburgning mashhur Shengen qishlog‘ida davom ettirdi. Ushbu ikki davlatdan tashqari sutka davomida Fransiya, Belgiya, Niderlandiya, Daniya, Shvetsiya, Polsha, Chexiya, Slovakiya va Vengriyada bo‘lib, safarini Avstriyada yakunladi. Britaniyalik o‘z oldiga mazkur mamlakatlarga samolyot, avtobus, poyezd yoki piyoda borishni maqsad qilib qo‘ygandi (Avstriya chegarasigacha bo‘lgan oxirgi ikki kilometrni u aynan piyoda kesib o‘tdi).
Britaniyalik sayohati tufayli farzandlari tug‘ilishdan avval, tug‘ruq jarayonida yoki undan keyin nobud bo‘lgan kishilarga yordam beruvchi xayriya jamg‘armasi uchun mablag‘ to‘plashga erishdi. Shunday fojia Leytonning singlisi Jemma bilan ham sodir bo‘lgandi. Sayyoh ushbu safarini 23-iyunda bo‘lib o‘tadigan mamlakatining YeIga a’zoligiga oid referendumga ham bag‘ishladi.
Izoh (0)