Kampalada 2010-yilda sodir etilgan teraktga aloqador besh kishi bir umrlik qamoqqa mahkum etildi, deya xabar bermoqda “TASS” Agence France-Presse’ga tayanib.
Uning ma’lumotlariga ko‘ra, yana ikki kishi 50 yilga qamalgan. Ularning barchasi 26-may kuni terrorizm, qotillik va suiqasd ayblovlari bo‘yicha aybdor deb topildi. Jazoga hukm etilganlarning to‘rt nafari keniyalik, ikki nafari ugandalik va yana bir nafari tanzaniyalikdir.
Bundan tashqari, shunga o‘xshash jinoyatlarni amalga oshirishda ayblangan besh kishi oqlandi, ammo hamon hibsda saqlanmoqda. O‘n uchinchi ayblanuvchi esa 27-may kuni jamoatchilik ishlari va kichik miqdordagi jarimaga tortildi.
2010-yil 11-iyulda Uganda poytaxtida qo‘sh terakt sodir etildi. Futbol bo‘yicha jahon chempionatining final o‘yini translyatsiyasi chog‘ida Kampaladagi ikkita barda portlash yuz berdi, natijada 76 kishi halok bo‘ldi, yana 50 ga yaqini yaralandi. Terakt uchun javobgarlikni “Ash-Shabob” guruhi o‘z bo‘yniga oldi.
Izoh (0)