Hindiston harbiy xizmatchilari Jammu va Kashmir shtatidagi ikki to‘qnashuvda jami yetti jangarini yo‘q qildi, deb xabar bermoqda “RIA Novosti” NDTV telekanaliga asoslanib.

Birinchi otishma Nougam sektoridagi nazorat chizig‘ida sodir bo‘ldi. Harbiylar Hindiston hududiga kirishga harakat qilgan qurolli guruhni payqab qolib, ularga qarata o‘t ochdi. To‘qnashuvda bir harbiy xizmatchi halok bo‘ldi.

Ikkinchi hodisa politsiya va harbiylar birgalikda operatsiya o‘tkazayotgan Tanmarg aholi yashash punktida ro‘y berdi. Xavfsizlik kuchlari jangarilar yashiringan uyni qamal qildi. Otishmada uch jangari o‘ldirildi, bir harbiy yaralandi.

Bir necha kun muqaddam shtatning yozgi poytaxti Shrinagarda jangarilar hujumi oqibatida uch politsiyachi halok bo‘ldi. Shundan buyon shtat bo‘ylab reydlar o‘tkazib kelinmoqda.