Moskva viloyatida 5 nafar bayker otib o‘ldirildi

8-may, yakshanba kuni tongda Rossiyaning Moskva viloyatida “Sayga” karabinidan besh nafar bayker otib o‘ldirildi. Bu haqda Tergov qo‘mitasining mintaqa bo‘yicha boshqarmasi ma’lum qildi, deb xabar beradi “TASS”.

“Mazkur holat yuzasidan tergov idoralari ikki va undan ortiq kishining o‘ldirilishi bo‘yicha jinoiy ish ochdi. Hodisa joyida tezkor tergov guruhi ishlamoqda”, — deb ma’lum qildi boshqarma vakillari.

Tergovchilarga ko‘ra, 8-may soat 6:00 atrofida Yegoryevsk rayonidagi Chelnoxovo qishlog‘ida, pivo zavodining tashlandiq binosi yaqinida mototsiklchilar guruhi va mahalliy fuqaro o‘rtasida mojaro kelib chiqqan. Mojaro davomida fuqaro “Sayga” karabinidan o‘q uzgan va buning oqibatida besh nafar bayker hodisa joyida halok bo‘lgan. Sodir etilgan jinoyatdan so‘ng gumonlanuvchi yashiringan.

Huquq-tartibot idoralari gumonlanuvchi, 27 yoshli kimsaning shaxsi aniqlanganini bildirmoqda. Viloyatda “Sirena” maxsus tadbiri e’lon qilindi.