Fransiyada prezident Ollandning reytingi navbatdagi antirekordni o‘rnatdi

Fransiya prezidenti Fransua Ollandni qo‘llab-quvvatlash darajasi u hokimiyatda bo‘lib turgan vaqt mobaynidagi eng past ko‘rsatkichga yetdi. Le Eco gazetasi buyurtmasiga ko‘ra so‘rov o‘tkazgan Elabe sotsiologik xizmati ma’lumotlari shundan dalolat bermoqda, deya xabar beradi “TASS”.

So‘rov natijalariga ko‘ra, o‘tgan oyda davlat rahbarining reytingi ikki punktga pasaygan. Respondentlarning atigi 16 foizi Ollandga va uning Fransiya oldida turgan asosiy muammolarni samarali hal etishiga ishonadi.

Elabe amaldagi prezident qo‘llab-quvvvatlanishining bunchalik past darajasini u saylangan 2012-yildan beri birinchi bor qayd etmoqda. Hatto mamlakat bosh vaziri Manyuel Valsning reytingi ham, garchi ikki punktga pasaygan bo‘lsa-da, Ollandga nisbatan yuqori bo‘lib, aprel oyida 20 foizni tashkil etgan.