O‘zbekistonning birinchi raketkasi Denis Istomin Ispaniya poytaxti Madrid shahrida davom etayotgan, Masters turkumidagi Mutua Madrid Open tennis turniridagi ishtirokini yakunladi.
Musobaqa rasmiy saytining ma’lum qilishicha, ATP reytingida 76-pog‘onada borayotgan O‘zbekiston vakili ikkinchi davrada dunyoning 8-raketkasi, chexiyalik Tomash Berdixga qarshi kortga chiqdi. Bir soatu 10 daqiqa davom etgan bellashuvda 6:3, 6:3 hisobi qayd etilib, Berdixning foydasiga hal bo‘ldi.
Eslatib o‘tamiz, musobaqani saralash bosqichidan boshlagan o‘zbekistonlik tennischi avvaliga ispaniyalik Albert Montanesni 6:4, 6:3, keyin esa qozog‘istonlik Mixail Kukushkinni 6:2, 2:6, 6:3 hisobida mag‘lubiyatga uchratib asosiy to‘r bahslariga kirishdi. Asosiy to‘rning birinchi davrasida 29 yoshli Istomin rossiyalik Teymuraz Gabashvili bilan kuch sinashdi hamda 6:1, 6:4 hisobida g‘alaba qozongan edi.
Izoh (0)