“Real” Chempionlar Ligasi yarim finalida “Manchester Siti”ni mag‘lub eta olmadi

Futbol bo‘yicha Yevropa Chempionlar Ligasi yarim finalidan joy olgan birinchi uchrashuvda Angliyaning “Manchester Siti” va Ispaniyaning “Real” klublari golsiz durang natijaga imzo chekdi.

Mazkur jamoalar Yevropa Chempionlar Ligasining 2011/12-yilgi mavsumi guruh bosqichida ham o‘zaro to‘qnash kelgandi. O‘sha yili Etihad stadionidagi o‘yinda 1:1 hisobi qayd etilgan bo‘lsa, Madridda “Real” 3:2 hisobida muvaffaqiyat qozongan.

Qayd etish kerak, jarohatidan endigina forig‘ bo‘lgan Krishtianu Ronaldu “Siti”ga qarshi uchrashuv qaydnomasidan joy olmadi. Bosh murabbiy Zinedin Zidan klub yetakchisining jarohati qaytalishi mumkinligini inobatga olib, tavakkal qilishni istamadi.

• Foto: “Manchester Siti”ga qarshi o‘ynamaydigan Krishtianu Ronaldu aynan hozir nima bilan band?

Madrid shahrida bo‘lib o‘tadigan javob o‘yini 4-may sanasiga tayin qilingan. “Manchester Siti” o‘z maydonida gol o‘tkazib yubormagani inobatga olinsa, “Santyago Bernabeu”dagi har qanday golli durang Angliya klubini YeChL finaliga olib chiqadi.

• “Manchester Siti” — “Real Madrid” 0:0. Matnli onlayn

Yevropa Chempionlar Ligasi Yarim final bellashuvi 26-aprel, seshanba

“Manchester Siti” — “Real Madrid” 0:0

“Manchester Siti”: Jo Xart, Bakari Sanya, Vensan Kompani, Fernando, Serxio Aguero, Xesus Navas (Rahim Sterling, 77), Kevin de Bryuyne, David Silva (Kalechi Ixeanacho, 40), Gael Klishi, Fernandinyo, Nikolas Otamendi.“Real Madrid”: Keylor Navas, Pepe, Serxio Ramos, Toni Kroos, Karim Benzema (Xese, 46), Garet Beyl, Marselo, Kazemiro, Daniyel Karvaxal, Lukas Vaskes, Luka Modrich.