O‘zbekistonning eng qimmat futbolchilari reytingi tuzildi

“Sports.uz” nashri “Transfermarkt.de” portalida O‘zbekiston terma jamoasi futbolchilariga qo‘yilgan narxlar asosida o‘zbekistonlik eng qimmat futbolchilar o‘nligini tuzib chiqdi.

9—10. Fozil Musayev – 400 ming yevroEronning “Sepaxon” jamoasida to‘p surayotgan Musayevning narxi 400 ming yevro etib ko‘rsatilgan. Fozil o‘z klubining eng qimmat futbolchilari ro‘yxatida 7-o‘rinda turibdi. Musayevning narxi o‘tgan yilgidan o‘zgarmagan.

9—10. Anzur Ismoilov – 400 ming yevroXitoyning “Changchung Yatay” klubida harakat qilayotgan Ismoilovning narxi ham 400 ming yevroni tashkil etmoqda. “Changchung”da Anzurdan qimmat bo‘lgan faqatgina ikki futbolchi bor.

7—8. Aleksandr Geynrix – 500 ming yevro31 yoshli Sashaning narxi yarim million. Qozog‘istonning “Ordabasi” klubi sharafini himoya qilayotgan Geynrix jamoaning 4-raqamli qimmatbaho futbolchisi bo‘lib turibdi. Hujumchining narxi bundan keyin pastlay boshlasa ajab emas.

7—8. Azizbek Haydarov – 500 ming yevroHaydarovning narxi o‘zgarmadi. BAAning “Ash-Shabob” jamoasida o‘ynayotgan Azizning ham narxi Geynrixniki singari 500 ming yevro etib belgilangan. U o‘z jamoasidagi eng qimmat futbolchilar ro‘yxatida 3-o‘rinni band etib turibdi.

5—6. Sanjar Tursunov – 1 million yevro“Transfermarkt.de” portalida Tursunovning narxi o‘tgan yilgiga qaraganda 200 ming yevroga arzonlashganini ko‘rish mumkin. Ammo 29 yoshli yarim himoyachining bu yil Ukrainaning “Vorskla” jamoasidan Qatarning “Um Salal” klubiga 1,7 million yevroga transfer qilingani haqida ma’lumot berilgandi.

5—6. Ignatiy Nesterov – 1 million yevroO‘zbekiston terma jamoasi tarixida eng ko‘p uchrashuv o‘tkazgan darvozabon Nesterovning narxi oldingi yilgidek 1 million yevroligicha qolgan. Toshkentning “Lokomotiv”i darvozasini qo‘riqlayotgan Ignatiy Osiyoning eng qimmat posbonlari o‘nligidan joy olgani ham diqqatga sazovordir.

3—4. Server Jeparov – 1,3 million yevroOsiyoning ikki karra eng yaxshi futbolchisi sifatida e’tirof etilgan Jeparov 1,3 million yevroga baxolangan. Server bu yili Janubiy Koreyaning “Ulsan” jamoasidan Toshkentning “Lokomotiv” klubiga ko‘chib o‘tdi.

3—4. Sardor Rashidov – 1,3 million yevroRashidovning narxi 1 yil ichida 9 barobarga ko‘paydi. Qatarning “Al Jaish” jamoasida to‘p surayotgan 24 yoshli hujumkor yarim himoyachi o‘z klubidagi eng qimmat futbolchilar ro‘yxatida 4-o‘rinni band etib turibdi.

2. Vitaliy Denisov – 7 million yevroTurkiya va Italiya klublari qiziqish bildirgan Denisovning transferi 7 million yevroga baholangan. Rossiyaning “Lokomotiv” klubi sharafini himoya qilayotgan Vitaliyning narxi o‘tgan yili bilan solishtirganda 1 millionga oshgan. Ahamiyatli jihati “temiryo‘lchilar”da Denisovdan qimmat faqatgina bir futbolchi bor, xolos.

1. Odil Ahmedov – 8,5 million yevroAhmedov mana bir necha yildirki o‘zbekistonlik eng qimmat futbolchi nomini begona qilmay kelmoqda. Rossiyaning “Krasnodar” klubida faoliyat yuritayotgan Odilning narxi 8,5 million yevroga teng. 29 yoshli yarim himoyachi o‘z jamoasida eng qimmat futbolchilar orasida 3-o‘rinda qayd etilgan.