Finlyandiya Mudofaa vazirligi Amerikaning zirhli texnikasi yetib kelishini tasdiqladi

Finlyandiya mudofaa vaziri Yussi Niiniste qo‘shma mashg‘ulotlarda qatnashish uchun AQSh armiyasi harbiy bo‘linmasi zirhli mashinalarda yetib kelishini tasdiqladi. Bu haqda “RIA Novosti” xabar beradi.

“AQSh qurolli kuchlarining 20 ga yaqin ‘Strayker’ zirhli mashinasi bahorning oxiriga belgilangan Arrow (“Kamon o‘qi”) harbiy mashg‘ulotlarida ishtirok etadi”, — deyiladi vazirlik xabarida.

Niinistening so‘zlariga qaraganda, Amerika harbiy texnikasining ishtirok etishi tashabbusi AQShdan chiqqan. Fevral oyining boshida fin matbuoti may oyida Finlyandiyadagi o‘quv mashg‘ulotlariga Oregon shtati Milliy gvardiyasining Harbiy-havo kuchlari yetib kelishi haqida xabar qilgan edi.

Oldinroq AQSh Norvegiyada sovuq urush yillaridan qolgan g‘orlarga tanklari va artilleriyasini joylashtirayotgani xabar qilingandi.