Futzal bo‘yicha Osiyo chempionatining “C” va “D” guruhlarida birinchi tur o‘yinlari o‘tkazildi

11-fevral, payshanba kuni futzal bo‘yicha Osiyo chempionati doirasida “C” va “D” guruhlarida birinchi tur o‘yinlari bo‘lib o‘tdi. Bu o‘yinlar musobaqa guruh bosqichining birinchi turiga yakun yasab berdi, deb xabar qiladi O‘zbekiston futzal uyushmasi matbuot xizmati.

“C” guruhidagi o‘yinlar “Universal” sport majmuasida o‘tkazildi. Unda dastlab, Tailand hamda Tojikiston o‘zaro bahslashdi. Qiziqarli va murosasiz kechgan o‘yinda 5:4 hisobi qayd etildi va Tailand terma jamoasi dastlabki 3 ochkoni qo‘lga kiritdi.

Ushbu guruhdagi boshqa bir o‘yin – Vyetnam hamda Xitoy Taypey o‘rtasidagi o‘zaro bahsda ham aynan shu hisob qayd etildi va vyetnamliklar g‘alabani nishonladi.

“D” guruhidagi birinchi o‘yinda amaldagi Osiyo chempioni — Yaponiya Qatar terma jamoasiga qarshi kechgan qiyin uchrashuvda 1:0 hisobida g‘alaba qozondi.

Guruhdagi ikkinchi o‘yinda Avstraliya Malayziyaga qarshi maydonga tushib, 2:1 hisobida zafar quchdi.