O‘zbekiston Davlat San’at muzeyida doston kechasi tashkillashtirildi
29-yanvar kuni OXUS Culture tashkiloti hamda O‘zbekiston Davlat San’at muzeyi hamkorligida O‘zbekiston xalq baxshisi Abdunazar Poyonov ishtirokida doston kechasini tashkillashtirdi. Ushbu kechada o‘zbek xalq an’anaviy dostonlaridan bo‘lmish “Kelinoy” dostoni ijro etildi. Bu haqda OXUS Culture tashkiloti “Daryo”ga xabar berdi.
Abdunazar baxshi ijro dasturidan “Alpomish”dostoni va “Go‘ro‘g‘li” dostoni turkumiga kiruvchi bir qancha dostonlar, shuningdek, doston ijrochiligi yo‘lidagi xalq qo‘shiqlari, termalar o‘rin olgan. Abdunazar baxshi ijrosidagi bir qancha doston va qo‘shiqlar O‘zbekiston teleradiokompaniyasi oltin fondidan o‘rin olib muntazam efirga uzatilib kelinmoqda.
Abdunazar baxshi Poyonov o‘z ijodi davomida Fransiya, Belgiya, Shveysariya, Tayvan, Turkiya, Ozarbayjon, Qozog‘iston va Qirg‘iziston davlatlarida bo‘lib, o‘zbek xalq baxshichilik an’analarini dunyo xalqlari orasida targ‘ib qilib kelmoqda.
