Estoniya politsiyasi va chegara mudofaasi departamenti rahbari Elmar Vaxer davlat hisobidan etik va naushniklar xarid qilishda gumon qilinmoqda. Bu haqda Meduza xabar beradi.
Vaxerga bu kabi ayblov parlamentning Ozod partiya fraksiyasi a’zosi va korrupsiyaga qarshi kurashish maxsus komissiyasi rahbari Artur Talvik tomonidan qo‘yilmoqda. Deputatning so‘zlariga qaraganda, politsiya rahbari Tallin aeroportida 299 yevroga naushniklar va 139,41 yevroga etik sotib olgan. U bularni go‘yoki politsiya formasi bilan kiyishini ro‘kach qilib, ular uchun politsiya departamenti bank kartasi orqali to‘lovni amalga oshirgan. Deputatning ta’kidlashicha, ish kiyimini xarid qilish faqat tender doirasida amalga oshiriladi.
Talvik, shuningdek, Vaxer tomonidan sotib olingan etik va naushniklar uchun xarajatlar hujjatini tasdiqlashdan bosh tortgan politsiya xodimi dekabr oyi boshida ishdan bo‘shatilganligiga e’tibor qaratdi.
O‘z navbatida, Vaxerning aniqlik kiritishicha, u chegaraga dala formasida borish uchun 30-sentabrda boshqarma kredit kartasi hisobidan xodimlar kiyib yuradigan etikni xarid qilgan. Sababi unda kerakli o‘lchamdagi forma oyoq kiyimi bo‘lmagan. Etik uchun sarflangan mablag‘ni u oyligidan olib qolishni so‘ragan va bu dekabrda bajarilgan.
Izoh (0)