Xonanda Lola (Yo‘ldosheva) YuNISEF bilan hamkorligi va bolalarni qo‘llab-quvvatlash bo‘yicha amalga oshirayotgan boshqa loyihalari haqida so‘zlab berdi, deya xabar bermoqda “Darakchi.uz”.
“YuNISEF tomonidan o‘tkazilgan tadbirlarda dastlab shunchaki mehmon sifatida qatnashgandim. Keyinchalik rahbariyat taklifi bilan hamkorlikni yo‘lga qo‘ydim. Hozir men bolalar huquqi bo‘yicha milliy chempionman”, — dedi xonanda.
Lolaning so‘zlariga ko‘ra, u bolalar huquqini himoya qilishda vakil sifatida faoliyat yuritadi. “YuNISEF bilan juda ko‘p xayrli ishlarni amalga oshirayotganimdan juda xursandman”, — deydi Lola.
Lola o‘zi ishtirok etayotgan boshqa bir yangi loyiha — audio ertak kitob chiqarish haqida ham so‘zlab berdi.
“Bu loyihani amalga oshirish bilan bolalarimizga ertak o‘qib berishimiz shartligini ota-onalarga eslatib o‘tmoqchi bo‘ldim. Chunki ishdan, tashvishlardan charchab bunday yumushlarga ko‘p ham vaqt ajratmasligimiz mumkin. Ammo ertak aytish bilan farzandlarimizning orzulari, o‘ylari, fikrlaridan xabardor bo‘lib turishimiz mumkin”, — deydi xonanda.
“Audio ertakning onalarga biroz yordami tegishi mumkin. Aslida bu farzandlarimning taklifi bilan amalga oshirildi. Kitobda ‘12 oy’ nomli ertakni o‘qib berganman. Ertak voqealarga xos musiqalar bilan bezatilgan. Masalan, suvning shildirashi, olovning yonishi kabi tovushlar bolalarimizning qiziqishini oshirishi aniq”, — deya qo‘shimcha qildi Lola.
Izoh (0)