Taniqli rejissor Zulfiqor Musoqov “Yaratganga shukr” badiiy filmining yaratilish tarixi bilan o‘rtoqlashdi. Bu haqda “Bekajon” gazetasi xabar bermoqda.
“Yaponiyaning NHK korporatsiyasi tanlab olgan 16 davlatdan kelgan yosh rejissorlar orasida men ham bor edim. Yaponlarning taklifiga binoan xalqimiz hayoti haqidagi ssenariyni yozishga rozi bo‘ldim. “Yaratganga shukr” deb nomlangan ssenariy tanlov ko‘rigi raisi, yapon rejissori Sakkey Imamuraga ma’qul bo‘lib, film olishni taklif qildi”, — deydi Musoqov.
“Xorij kino ustalarining o‘zbek kinosi, millatimizning turmush tarzi, faqat bizgagina xos fazilatlar bilan qiziqishlariga javoban suratga olingan bu film o‘zbek tomoshabinlarining ko‘nglidan ham munosib joy olganidan xursandman”, — deya qo‘shimcha qildi taniqli rejissor. 27 kunda suratga olingan filmning ilk namoyishi Tokiodagi Osiyo filmlari kinofestivalida bo‘lib o‘tgan.
Avvalroq, filmda bosh rolni ijro etgan aktyor Rustam Sa’dullayev “Yaratganga shukr”dagi sehrgarlik sahnalari qanday suratga olingani haqida so‘zlab bergandi.
Izoh (0)