Parijdagi teraktlar terrorchilarning uch guruhi tomonidan amalga oshirilgan. Bu haqda Fransiya prokurori Fransua Molyan matbuot anjumani chog‘ida ma’lum qildi, deya xabar bermoqda “Liga”.
“Bu xunrezlik ortida bir-biri bilan uzviy aloqada bo‘lgan uchta terrorchi guruh turgan. Tergov ularning sheriklari, homiylari, mazkur amaliyotning moliyalashtirish manbalarini aniqlashga harakat qiladi. Teraktlar uchun javobgarlikni zimmasiga olishi to‘g‘risidagi IShID bayonoti ham sinchiklab o‘rganiladi”, — deya ta’kidlagan prokuror.
Molyanning aytishicha, “Bataklan” teatrida kishilarni tutqunlikka olgan terrorchilardan birining shaxsi aniqlangan. U 1985-yilda tug‘ilgan Fransiya fuqarosi bo‘lib, Kurkuron shahrida yashagan. 2004—2010-yillarda 8 marta huquqbuzarlikka yo‘l qo‘ygan, biroq qamoqqa olinmagan. 2010-yili radikal g‘oyalar tarafdorlari ro‘yxatiga tushgan, biroq terrorchilar bilan aloqalari aniqlanmagan.
“Stad De Frans” stadioni atrofida o‘zini portlatib yuborgan terrorchining yonidan 1990-yili tug‘ilgan suriyalikning pasporti chiqqan, biroq uning egasi fransuz maxfiy xizmatlariga ma’lum emas. Terrorchilar shturm vintovkalaridan foydalangan, xudkushlarda esa TATP portlovchi qurilmasi bor nimchalar bo‘lgan.
Izoh (0)