“Toshshahartransxizmat” AK joriy yilning 1-avgustidan e’tiboran Qo‘yliq markazidan TTZgacha bo‘lgan yo‘nalishda qatnovchi 13-tramvayning “Toshkent” vokzalidan TTZgacha bo‘lgan qismi qisqartirilayotganini ma’lum qiladi.
Yo‘nalishning umumiy uzunligi 21,6 kilometrni tashkil etib, Traktorsozlar mavzesidan Yuzrabot, Mirzo Ulug‘bek, Feruza ko‘chalari orqali, Kichik halqa yo‘liga chiqib, Shimoliy vokzalgacha, so‘ng Mehrjon ko‘chasi bo‘ylab Farg‘ona yo‘li ko‘chasidan Qo‘yliq markazigacha bo‘lgan 21,6 kilometr oraliqda harakatlanadi.
Mutaxassislar tomonidan ko‘p bora o‘rganishlar natijasida mazkur yo‘nalishning aynan qisqartirilayotgan qismining ham harakat xavfsizligi, ham korxonalarning iqtisodiy samaradorligi va boshqa omillar qiyoslab chiqildi.
Birinchidan, ushbu yo‘nalish Toshkent shahrini Toshkent viloyatining tog‘li tumanlari bilan bog‘lovchi yildan-yilga transport oqimi kuchayib borayotgan yo‘nalish hisoblanadi. Ochig‘i, ushbu yo‘nalishda ayniqsa, shanba-yakshanba kunlari hamda kunning ayni tig‘iz paytida harakatlanish tobora qiyinlashib bormoqda. Qolaversa, ushbu yo‘nalishda Toshkent viloyatining Chirchiq shahri, Qibray, Bo‘stonliq tumanlari bo‘yicha katta yo‘lning rekonstruksiya qilinishi, kengayishi ham bugungi kunning dolzarb masalalaridan hisoblanadi.
Birgina misol, tramvay yo‘lining olib tashlanishi Yuzrabot, Feruza, Mirzo Ulug‘bek va Taraqqiyot ko‘chalaridagi qatnov yo‘lining kengaytirilishi rejalashtirilmoqda. Bu kengayish qariyb 10 metrni tashkil qilmoqda, bu esa mazkur yo‘ldagi harakatning ancha yengillashuviga olib kelishi shubhasiz.
Qibray, Chirchiq, Bo‘stonliq, Oqtoshga har kuni qatnab ishga borib keladigan qanchadan-qancha kishilar uchun yo‘lning torligi, qish-qirovli, qolaversa jazirama kunlarda qanchalik noqulayliklar tug‘diradi. Mirzo Ulug‘bek ko‘chasida olib boriladigan ishlar natijasida 8 polosali tezyurar yo‘l paydo bo‘ladi.
Toshkent shahri aholisi va mehmonlariga avtobus, metro va tramvaylarda transport xizmati ko‘rsatilar ekan, ularning har birining o‘z tannarxi, xarajatlar va daromadlar qiyoslanadi. Transport turiga qarab yo‘lovchi tashish xarajatlari tramvaylarda avtobuslardagiga nisbatan 1,5 barobar ortiq, ya’ni tramvayda bitta yo‘lovchi tashish uchun qilinadigan harajatlar 2400 so‘mdan ko‘pdir. Hozir amalda bo‘lgan yo‘lovchi tashish tarifi 1000 so‘mligini hisobga olganda, xarajatlar 2,4 barobarni tashkil qilayotgani ham e’tiborga molik faktdir.
13-sonli tramvay yo‘nalishining qisqartirilishi munosabati bilan yo‘nalishlardagi yo‘lovchilar oqimi o‘rganildi. Yo‘lovchilarning talabini qondirish maqsadida qisqartirilayotgan yo‘nalish qismiga transport xizmati ko‘rsatish maqsadida yangi 14-sonli “TTZ – Toshkent vokzali” avtobus yo‘nalishi tashkil qilindi. Yo‘nalishda Mercedes-Benz Low Floor rusumli 12 ta avtobus 7—8 daqiqali interval bilan harakatlanib, aholiga xizmat ko‘rsatmoqda.
Izoh (0)